បន្ទាយមានជ័យ ៖ នគរបាលកម្ពុជា ដឹកនាំដោយលោក ឌី វិជ្ជា អគ្គស្នងការរងនគរបាលជាតិកម្ពុជា និងជាប្រធាននាយកដ្ឋានកណ្ដាលសន្តិសុខ តំណាងលោក ស ថេត អគ្គស្នងការនគរបាលជាតិកម្ពុជា នៅថ្ងៃត្រង់ទី១១ ខែមករា ឆ្នាំ ២០២៥ បានបញ្ជូនជនដៃដល់បាញ់សម្លាប់លោក លិម គិមយ៉ា អតីតតំណាងរាស្រ្តគណបក្សប្រឆាំងទៅឱ្យភាគីថៃវិញតាមច្រកអន្តរជាតិប៉ោយប៉ែតនៃខេត្តបន្ទាយមានជ័យ។

ការប្រគល់-ទទួលជនជាតិថៃនេះខាងភាគីថៃដឹកនាំដោយលោក YENTHUAM somprasong អគ្គស្នងការរងនគរបាលជាតិថៃ។ ក្នុងឱកាសនោះមានអ្នកសារព័ត៌មានកម្ពុជានិងថៃជាច្រើនចោមរោមផ្តិតយករូបភាព និងសម្ភាសផងដែរ។

ជនដៃដល់ជនជាតិថៃ ដែលសមត្ថកិច្ចកម្ពុជាចាប់បានបញ្ជូនឱ្យភាគីថៃមានឈ្មោះ Ekkalak pheanoi បានបាញ់សម្លាប់លោក លិម គិមយ៉ា អតីតតំណាងរាស្ត្រខេត្តកំពង់ធំ ត្រូវបានសមត្ថកិច្ចកម្ពុជាបញ្ជូនចេញពីប្រទេសកម្ពុជា តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ដើម្បីឱ្យភាគីថៃបន្តអនុវត្តនីតិវិធី។

សូមបញ្ជាក់ថា ជនសង្ស័យជាជនជាតិថៃនេះមានឈ្មោះ Ekkalak pheanoi ត្រូវបានកម្លាំងនគរបាលកម្ពុជា ខេត្តបាត់ដំបង បានឃាត់ខ្លួនកាលពីថ្ងៃទី៨ ខែមករា ឆ្នាំ២០២៥ នៅក្នុងទឹកដីខេត្តបាត់ដំបង បន្ទាប់ពីជននេះបានបាញ់សម្លាប់លោក លិម គិមយ៉ា អតីតតំណាងរាស្ត្រគណបក្សប្រឆាំងកម្ពុជា ហើយរត់គេចខ្លួនមកកម្ពុជាតាមច្រករបៀង ហើយត្រូវបានចាប់ខ្លួន និងបញ្ជូនទៅអគ្គស្នងការនគរបាលជាតិកម្ពុជា ។ ហើយនៅថ្ងៃនេះ អគ្គស្នងការនគរបាលជាតិ ដឹកនាំដោយលោក ឌី វិជ្ជា បានបញ្ជូនជនសង្ស័យខាងលើ ប្រគល់ឲ្យខាងភាគីថៃវិញ៕